L’associacion

L’Estancabra es una associacion fondada en novembre 2014, que l’objèct n’es de promòure la lenga e la cultura occitana en encoratjant la socializacion de l’occitan amb una programacion d’eveniments ludics, culturals, esportius…

Per aquò, nòstre objectiu a un tèrme mejan es la gestion d’un café cultural a Tolosa, ont la lenga occitana siá emplegada, e la cultura valorizada.

Un detzenat d’administrators pòrtan lo projèct, sostenguts per un trentenat de membres actius e mai d’un milierat de personas mostrèron lor interès en participant a nòstras activitats.

L’Estancabra, l’estanquet de la cabra !

estancabra logoLa cabra, es lo simbòl oficiós e faceciós d’Occitània, un animal que resistís e romèga, mas que sap tanben far sorgir sa cançoneta de cabreta quora a un bon veirat de vin de Gasconha, de Lengadòc o de Provença dins lo nas !
E l’estanquet aquò’s per s’estancar, per siropejar, crostejar, chacharrar, refar lo monde en començant pel seu barri, amb son vesin e lo qu’o vòl plan. E se tu o vòs plan, l’Estancabra aquò serà un café cultural dedicat a la lenga e la cultura occitana, un luòc per chapar e charrar, se rencontrar e se retrobar, un luòc de mestissatge, de partatge e de convivéncia. Brac, un café que bolèga, un café ont bolh la lenga !

Perqué un café cultural occitan a Tolosa ?

La cultura occitana aparten pas a degun, o puslèu es de totes ! Al nòstre vejaire, es una font de convivéncia, de benanança, de libertat e de dobèrtura qu’es la cultura de l’amor, mas pas sonque…
Pertant, los luòcs que fan viure cada jorn aquela cultura e aquela lenga a Tolosa l’occitana son pas tant nombroses ! Alara nosaus, coma sèm pas de fenhassas, nos sèm dich que l’anàvem far aquel estanquet, per se pausar a l’entorn d’una tauleta, se manjar un pan-tomaquet en escotant de bona zica d’aquí e d’alhors, far tot un fum d’espectacles, de talhièrs, d’animacions de tota borra e aculhir un molon de gents e de projècts. Un luc dobèrt a caduna e cadun, a totas las culturas e lengas del monde, perque cresèm, sabèm, sèm segurs, que « totas las lengas e culturas son egalas entre elas » (F. Castan) e an drech a la reconeissença e al sosten.

Los axes del projèct

4 Axes du projet Estancabra

Deviens chèvre, fai-te cabra !

Ses motivat-da ?  Alara vèni amb nosaus bolegar, que la taula redonda de l’Estancabra es obèrta a totes ! Se vòs donar la man, nos pòs ajudar en :

  • Venent membre de l’associacion Estancabra.
  • Assistissent a las seradas que proposam.
  • Fasent un don a l’associacion a la nautor de tas amors cabrescas.
  • Portant tas idèas, tos projècts, tas envejas…
  • En parlant a l’entorn de tu, a tos amics, ta familha, tos colègas…

Per le moment…

Pel moment, l’Estancabra ocupa l’ancian Estanquet de la Portièra, al 42 carrièira dels Blanquièrs, dins lo quartièr Sant Pèire de Tolosa, e sèm dobèrts cada ser de fin de setmana. Fai-nos vesita ! Cercam tanben un local per la seguida. S’as d’idèas, nos pòs contactar de mantun biais :

contact@estancabra.com
facebookFacebook

twitterTwitter